Vetëm 8 ditë na ndajnë nga zgjedhjet për “punën më të rëndësishme në botë”, por politologu i njohur amerikan Edward Luttwak thotë se skandale të fuqishme do të godasin SHBA-në.
Sondazhet e kryera ditët e fundit në Amerikë e kanë lënë të hapur luftën për president, por Luttwak mendon se edhe nëse Hillary Clinton fiton, fati i saj do të jetë i shenjuar nga skandali i emaileve.
Politologu i njohur thotë në një intervistë për median italiane “Giorno” se “Nga vazo e Pandorës do të dalin të tjerë skandale. Jo vetëm Hillary, Bill apo Fondacioni Clinton, por do të dalin skandale dhe për vajzën e tyre Chelsea”, thotë Luttwak.
Sipas tij hetimet për Clinton nga ana e FBI do të vijojnë edhe nëse ajo zgjidhet presidente, “Edhe nëse e shkarkojnë drejtorin e FBI, që është zgjedhur nga administrata demokrate, hetimet do të vazhdojnë”.
“Nëse Clinton fiton por Dhomën e marrin Republikanët, mund të ngrenë një Hetim Special për skandalin e emaileve”, thotë politologu.
Sipas Luttwak, “gjithë mëkatet e Clinton kanë ndodhur kur ishte sekretare Shteti”.
Ai thotë se ajo ka bërë disa herë shpërdorime detyre dhe ka përfituar fonde të paligjshme.
“Ju tregoj një shembull. Princi i Katarit kërkoi një seancë dëgjimore për të mbyllur një marrëveshje me Departamentin e Shtetit, por nuk mori asnjë përgjigje. Atëherë princi dhuroi shuma të mëdha parash në Fondacionin Clinton. Dyert e DASH u shqyen, jo u hapën, për të”, rrëfen Luttwak.
Ai shton se “pavarësisht rezultatit, 8 nëntori mund të jetë nisja e një kaosi amerikan, dhe pse jo, botëror”./Tema/
