Policia në Malësinë e Madhe ka vënë në pranga një 29-vjeçari pasi u përfshi në një konflikt me xhaxhain e tij për motive pronësie. Bëhet e ditur se i riu me iniciale S. K., banues në fshatin Gruemirë-Çezme, pas konfliktit me xhaxhain 64-vjeçar ka qëlluar në ajër me armë zjarri automatik.
Pas incidentit, ai u arrestua në flagrancë. Gjatë kontrollit të zonës, në vendin e quajtur “Grop Kuqe Bracaj” të fshatit Gruemirë-Çezme, Malësi e Madhe, u gjet dhe u sekuestrua në cilësinë e provës materiale arma e zjarrit me të cilën dyshohet se ka qëlluar në ajër i riu.
Materialet iu referuan Prokurorisë pranë Gjykatës së Rrethit Gjyqësor Shkodër, për veprat penale “Kanosja” dhe “Mbajtja pa leje e armëve dhe e municionit”.
g.kosovari
