Pas publikimit të dokumentit reagon ashpër Nishani: Qeveria po mashtron

Presidenti i Republikës, Bujar Nishani ka reaguar ashpër pas publikimit të dokumentave, në të cilat është firma e tij si ish- ministër i Brendshëm që autorizonte përdorimin e pajisjeve përgjuese në bashkëpunim me shtetin italian në luftën kundër krimit. Kjo marrëveshje e vitit 2007 parashikon edhe shkëmbimin e eksperiencave dhe trajnimeve në fushën e përgjimeve. Por kreu i shtetit 7 vite më vonë e sheh në një këndvështrim krejt tjetër këtë çështje. Sipas tij, marrëveshja e bashkëpunimit midis shtetit shqiptar dhe atij italian në luftën kundër krimit të organizuar nuk ka asnjë lidhje me veprimet antiligjore dhe të dënueshme të përdorimit të mjeteve ilegale dhe të paligjshme nga Policia shqiptare.

“Presidenti i Republikës dënon dhe distancohet nga tentativa e papërgjegjshme e Qeverisë për të ngatërruar bashkëpunimin dhe partneritetin e shkëlqyer midis Shqipërisë dhe Italisë në luftën kundër krimit të organizuar, me veprime ilegale dhe të paligjshme të segmenteve të caktuara të Ministrisë së Brendshme në Shqipëri”, thuhet në njoftim për shtyp të Presidencës.

Nishani shkon edhe më larg duke akuzuar Qeverinë shqiptare se po pengon ushtrimin e funksionit kushtetues dhe detyrën ligjore të Prokurorisë së Shtetit për hetimin e ekzistencës dhe përdorimit të një pajisjeje interceptuese nga ana e Ministrisë së Brendshme.

“Qeveria t’i dorëzojë sa më parë autoriteteve të hetimit pajisjen e kërkuar nga organi i Prokurorisë dhe të gjithë dokumentacionin tjetër të nevojshëm për procesin e hetimit. Qeveria të ndalojë përpjekjet për mashtrimin e opinionit publik në lidhje me marrëveshjet e bashkëpunimit me shtetin italian. Presidenti i Republikës i kërkon Prokurorit të Përgjithshëm të ushtrojë të gjithë autoritetin ligjor për të shmangur çdo pengesë që krijohet në hetimin dhe zbulimin e së vërtetës”, përfundon njoftimi për shtyp i Presidencës.

(javanews) ma.me