Qytetarët e Tiranës kanë arritur fitoren e parë në betejën e tyre kundër ndërtimit të pallatit 17 katesh te Diga e Liqenit. Pas protestës së organizuar sot nga Bashkia e Tiranës dhe ku morën pjesë qindra qytetarë, Gjykata Administrative e Apelit ka shtyrë për në 13 maj seancën gjyqësore për çështjen ku kompania e ndërtimit “Gener 2” ka paditur IKMT dhe kërkon heqjen e masës së pezullimit të punimeve të pallatit.
Sipas vendimit të Gjykatës, seanca që ishte parashikuar të mbahej sot do të zhvillohet ditën e premte. Gjithashtu në vendimin e Gjykatës bëhet e ditur se gjyqtarja Alkelina Gazidede ka dhënë dorëheqjen nga gjykimi i kësaj çështje.
“Gjykata vendosi shtyrjen e dhomës së këshillimit për në datë 13 maj ora 9 e 30 deri sa të shqyrtohet çështja e përjashtimit të trupit gjykues nga një trup tjetër e kësaj gjykate dhe për tu shqyrtuar kërkesa e gjyqtares Alkelina Gazidede nga kryetari i kësaj gjykate për heqjen dorë të saj nga gjykimi i kësaj çështje”, thuhet në vendimin e sotëm të Gjykatës.
Kështu Gjykata ka vendosur t’i japë kohë vetes për të shqyrtuar edhe një herë kërkesën e Bashkisë së Tiranës për të ndryshuar përbërjen e trupit gjykues me pretendimin se ata kanë lidhje familjare apo biznesi me ndërtuesin e pallatit. (javanews.al / a.r)
