Pas një kursi intensiv dyjavor të përditshëm, sot në FSHF të gjithë pjesëmarrësit në kursin për “Drejtor Sportiv” kanë marrë edhe diplomat përkatëse, shoqëruar edhe me kartën e liçensimit. Për një periudhë të konsiderueshme kohe, të gjithë kursantët kanë ndjekur seancat e këtij kursi për të gjitha pikat që fokusojnë pozicionin e Drejtorit Sportiv.
Diplomat për drejtorët sportivë, janë shpërndarë nga Sekretari i Përgjithshëm i FSHF-së, Ilir Shulku, i cili në ceremoninë e diplomimit u shpreh: “Një falenderim paraprak, për të gjithë ju, pjesëmarrësit në këtë kurs, por edhe të gjithë bashkëpunëtorëve që kanë referuar gjatë ditëve të këtij kursi. Ne sapo kemi përfunduar një nga shumë kurset e licensimit, që zhvillon sektori përkatës dhe gjithçka keni përfituar nga ky kurs, mendoj se do t’ju vlejë në angazhimet tuaja të mëtejshmë në këtë pozicion”.
Më pas për secilin nga pjesëmarrësit, Sekretari i Përgjithshëm i FSHF-së, Ilir Shulku ndau diplomat shoqëruar me kartat përkatëse të liçensimit. Po kështu, të gjithë Drejtorëve Sportivë në këtë kurs bashkangjitur iu dorëzua edhe nga një USB me të gjitha materialet e zhvilluara gjatë ditëve të këtij kursi.
Kujtojmë se një ndër ata që kanë marrë certifikatën nga FSHF ka qenë edhe vëllai i kryeministrit, Olsi Rama i cili tashmë është zyrtarisht drejtor sportiv i Partizanit.
