Asnjë viktimë nga COVID-19 nuk është regjistruar në 24 orët e fundit në Kosovë. Gjatë kësaj kohe janë raportuar edhe 4 raste të reja të infektuara me këtë virus.
Kështu është bërë e ditur nga Ministria e Shëndetësisë. Në 24 orët e fundit janë dhënë 498 doza të vaksinës kundër COVID-19.
Prej fillimit të vaksinimit në të gjitha qytetet e Kosovës janë dhënë 1.665.209 doza të vaksinës. Deri më sot 780.327 qytetarë janë vaksinuar me dozën e dytë.
Sot janë shëruar 10 qytetarë, derisa numri i përgjithshëm i të shëruarve është 158.010. Në total numri i rasteve aktive është 343.
Pas Shqipërisë, edhe autoritetet shëndetësore në Kosovë raportuan mbëmjen e së dielës se varianti Omicron i koronavirusit, ka hyrë në vend.
Në një njoftim të Institutit Kombëtar të Shëndetësisë Publike të Kosovës, thuhet se nga 22 mostra pozitive në SARS-CoV-2, të periudhës kohore 15 deri 25 dhjetor 2021, të cilat u dërguan për ekzaminim në Gjermani, janë konfirmuar 9 raste me Omicron.
Sipas institutit, dy raste janë të importuara nga Shtetet e Bashkuara, dy nga Mbretëria e Bashkuar, një nga Franca dhe katër raste me variantin Omicron të detektuara, janë në komunën e Mitrovicës, të cilët mohojnë historinë e udhëtimit dhe se kanë pasur kontakte me dikë nga jashtë.
Të dielën, në Kosovë u shënuan 12 raste të reja të infektimeve, nga 2430 testime dhe një humbje jete./m.j
