Në një kohë kur pritet implementimi dhe zbatimi i Reformës në Drejtësi, si skusht kryesor i vendosur nga BE për integrimin e vendit tonë, të dënuarit me burg për jetë, apo persona të njohur të botës së krimit, po fitojnë njëri pas tjetrit lirinë.
Gjykata e Krujës liroi me kusht të dënuarin me burgim të përjetshëm, Endrit Doklen, ndërsa një tjetër emër i botës së krimit, i njohur në kryeqytet, po përgatitet të dalë nga qelitë e burgut të Fushë-Krujës.
Genci Ferhati, i dënuar me 25 vite burg, po përgatitet të dalë nga qelia. Në Tiranë, është raportuar nga mediat, se edhe një tjetër emër i njohur, i dënuar me burgim të përjetshëm Arben Grori, po bën përpjeke për tu liruar nga qelia.
Ferhati, është dënuar nga gjykata e Tiranës, për atentatin me kundërtank në vitin 1999, duke vrarë Denis Ginën dhe Median Shehun, ngjarje kjo e ndodhur në ish-fushën e druve, Allias.
Veç këtij dënimi, Ferhati, ka dhe një dënim tjetër me 6 vite burgim të dhënë në 6 janar 2017 nga Gjykata e Apelit për Krime të Rënda, për akuzën e “Shtrëngimit me anë të kanosjes ose dhunës për dhënien e pasurisë” në dëm të një tregtari kafeje.
Por dë dyja këto dënime në ngarkim të Ferhatit janë bashkuar pak vite më parë, në një të vetëm. Genci Ferhati, konsiderohet si i forti i “Rrugës së Kavajës” dhe miku i Emiljano Shullazit.
Prej dhjetorit 2018, Ferhati po ndjek thuajse të njëjtën rrugë ligjore në gjykatën e Krujës, siç dhe veproi dhe fitoi lirinë, anëtari i bandës së Durrësit, Endrit Dokle. Burime pranë gjykatës së Krujës, thanë se Genci Ferhati prej dhjetorit 2018 e deri më tani, ka depozituar 8 kërkesa në gjykatë me objekt ulje dënimi dhe njohje të amnistive të viteve 2012, 2014, 2015 dhe 2016.
Veç kërkesave për njohjen e amnistisë, Ferhati ashtu si Dokle ka depozituar një sërë kërkesash në gjykatën e Krujës, për ulje dënimi. Të gjitha kërkesat për ulje dënimi, janë pranuar nga gjyqtarja Enkeleida Hoxha, e cila fillimisht në dhjetor të 2018 ka pranuar uljen me dy muaj e 10 ditë burgim për Genci Ferhatin.
Por, 7 muaj pas këtij vendimi në datën 2 korrik 2019, që njëjta gjyqtare, Enkeleida Hoxha, ka vendosur t’i ulë 2 vite e 5 muaj burgim, Ferhatit. Kjo pasi Hoxha, ka vendosur ti pranojë uljen e dënimin me 90 ditë burgim, për 10 vite me radhë, duke filluar për periudhat si më poshtë 1999-2000, 2000 deri 2001, viti 2003, viti 2006, 2007,2008,2009, viti 2016 dhe për periudhën kohore 2017.
Ulja e viteve të dënimit për këtë të dënuar ka vijuar edhe në 27 dhjetor 2019, ku gjyqtarja Enkeleida Hoxha ka pranuar ti ulë dënimin me 90 ditë burgim ose 3 muaj. Por pas uljeve dy herë të dënimit, Ferhati, tashmë i është drejtuar gjykatës së Krujës me katër kërkesa për njohjen e amnistisë për vitet 2012, 2014, 2015 dhe 2016.
Dy nga kërkesat e Ferhatit, ku gjyqtare ka qenë Alma Kolgjoka dhe Anastasi Shehu, janë pushuar nga gjykata për shkak se Ferhati dhe mbrojtësit e tij, nuk janë paraqitur në seancën gjyqësore.
Kërkesa për njohje amnistie për vitin 2014 i ka rënë gjyqtares Enkeleida Hoxha, e cila vijon ende të mos ketë dalë me një vendim përfundimtar nëse do e pranojë ose jo, kërkesën e Ferhatit. Ndërsa kërkesa e Ferhatit për njohjes e amnistisë të vitit 2012 është në shqyrtim nga gjyqtarja Ëngjëllushe Tahiri dhe ende nuk ka një vendim përfundimtar.
Në 13 janar 2020, dy kërkesat për njohje amnistie për vitet 2015 dhe 2016, janë ridepozituar në gjykatën e Krujës, ku në shqyrtim gjyqësor, ato janë marrë nga kryegjyqtarja e Krujës, Alma Kolgjoka.
/a.r
