Kampionati Evropian i Snooker-it është një tjetër risi e transmetimeve të RTSH Sport. Për herë të parë, Transmetuesi Publik paraqet “Direkt” një aktivitet Evropian të këtij sporti që zhvillohet në Shqngjin. Pas Kampionatit Botëror të Aeronautikës në disiplinën e fluturimeve të lira, zhvilluar në Vlorë, një tjetër event i rëndësishëm ndërkombëtar është pjesë e transmetimeve “LIVE” të kanalit të dedikuar të Sportit të paketës digjitale të RTSH-së.
27 vende të kontinentit kanë sjellë plot 170 bilardistë që përballen për disiplina të ndryshme. Deri tani, ka përfunduar disiplina me 6 gure të kuq, ku kampion është shpallur Helgison. Bilardisti nga Islanda ka mundur në finale britanikun Braun me rezultatin 5-2. Edhe Shqipëria po përfaqsohet mirë në këtë aktivitet, sidomos Edmond Zaja dhe Dorian Maknori kanë arritur rezultate të mira. Ditën e dielë, shpallen kampionët e “Turneut të hapur individual” që do të vij në RTSH Sport me ndeshjet çerekfinale në orën 10.00, me gjysëmfinalet në orën 14.00 dhe finalen e madhe në orën 18.00. Pretendimi i Shqipërisë është që të renditet mes 5 ekipeve të para të Evropianit, ndërkohë që Presidenti i Federatës së Snooker-it Ogert Shkrepa përveç arritjeve sportive ka bërë maksimumin që bilardistët nga gjithë Evropa të gjejnë kushtet optimale në Shëngjin.
Sinajli i RTSH Sport nëpërmjet adresës elektronike:http://rtsh.al/rtsh-live/RTSH-sport.html ndiqet dhe shpërndahet nga Federata Evropiane e Snooker-it për çdo shtet pjesëmarrës. Çdo sfidë vjen direkt nga Shëngjini në një transmetim të Telesport dhe të RTSH-së që tregon edhe një herë, që është afër eventeve të mëdha kombëtare dhe ndërkombëtare të sportit tonë.
