Edhe pse dihej se kush ishte Frederik Shopen, kompozitori dhe pianisti i njohur franko-polak, shkaku i vdekjes së tij, në moshën 39-vjeçare, për shumë kohë mbeti mister. Zemra e artistit, ruajtur prej 168 vitesh në një flakon mundi të zbulonte të vërtetën.
Vdekja e artistit në vitin 1849 iu atribua turbekulozit, edhe pse nuk ishte e sigurt, deri në kohën që ekspertët mjekësorë polakë përmendën në vitin 2008 hipotezën sipas të cilës, Shopen, me shëndet të brishtë, kishte vuajtur nga fibroza cistike.
Kjo sëmundje gjenetike e rrallë prek veçanërisht rrugët e frymëmarrjes. Myku, një sekrecion që vjen nga bronket, trashet dhe bllokon organet përkatëse. Jetëgjatësia e të sëmurëve të prekur është rreth 40 vjeç. Studiuesit polakë kanë mundur të ekzaminojnë me teknika moderne zemrën e Shopenit, të ruajtur prej 168 vitesh në një flakon kristali të mbushur me një lëng konservues, që mendohet të jetë konjak, dhe vendosur në një shtyllë të kishës të Kryqit të Shenjtë në Varshavë.
Konform dëshirës së kompozitorit, i cili prehet në varrezat parisiane të Père-Lachaise, relikti ishte kthyer në Varshavë pak pas vdekjes nga motra e tij më e madhe Ludvika. “Pas analizës, mund të themi se është shumë e mundshme se bëhej fjalë për turbekuloz”, theksoi profesori Michal Ëitt, specialist i gjenetikës molekulare.
Për të dhënë një diagnozë, ekipi i studiuesve ka punuar mbi fotografitë me rezolucion të lartë, pasi autoritetet polake nuk kanë lejuar hapjen e flakonit të mbyllur hermetikisht nga frika e dëmtimit të saj.
Zemra e Shopenit ishte ekzaminuar për herë të fundit në vitin 1945, pas Luftës së Dytë Botërore, përgatiti Express. (b.an)
