“Demat e Kuq” kanë dalë kokëulur nga “Selman Stermasi” pas humbjes 0-2 kundër Laçit.
Një rezultat zhgënjyes ky për djemtë e drejtuar nga italiani Mark Iuliano, të cilët pretendojnë për këtë vit edhe trofeun e munguar prej vitesh.
Pavarësisht se të kuqtë kanë dominuar lojën, laçianët kanë qenë më konkretë duke gjetur dy herë rrjetën. Fraksioni i parë i ndeshjes u mbyll me rezultatin 0-0, pas fillimit të pjesës së dytë Kallaku kaloi në avantazh të tijët në të 59-ën, e ndërsa loja po fliste kryesisht për “Demat e Kuq”, Eskarada dyfishoi rezultatin në të 70-ën.
E ndërsa ndeshja po i afrohej fundit në të 89’, Ademir Souza i Laçit u ndëshkua me kartonin e dytë të verdhë duke u larguar nga fusha. Por dalja e tij me të kuqe ka shërbyer sa për statistikë, pasi minutat e mbetura nuk sollën asgjë të re për të kuqtë.
a.ç
