Partizani rikthehet tek ftorja dhe heroi i ndeshjes është Astrit Faslliu. Falë fitores arritur me shumë vuajtje përballë Vllaznisë me rezultatin 1-0, të kuqtë rikthejën avantazhin prej 4 pikësh nga ndjekësit e Skënderbeut.
Ndeshja vendoset në minutën e fundit të kohës së rregullt, kur krosimi perfekt i Trashit gjen goditjen fitimtare të Astris Faslliut që ngre peshë “Qemal Stafën”. Partizani në avantazh pas 90 minutash lojë, të kuqtë në eufori. Në minutat e shtesës asgjë tjetër për tu evidentuar në fushën e lojës por nota stonuese vjen nga stolat me Starovën që duket të dalë me akull në fytyrë i dëmtuar gjatë festimeve, gjithsesi gjithçka është pa problem sa mund të përdoret edhe një batutë, këtë herë edhe trajneri ka dhënë gjakun në stol.
Fitore ka arritur edhe Teuta e cila konfirmohet forca e tretë e kampionatit.
Skuadra e Gugash Maganit u konfirmua si surpriza më e bukur e këtij sezoni në kategorinë Superiore pasi mundi 1-0 Kukësin në Niko Dovana duke u ngjitur në kuotën e 23 pikëve dhe tashmë pozicionohet e vetme në vendin e tretë të klasfikimit. Një gol i Bruno Ditës vendosi fatet e këtij takimi që për nga mënyra se si u luajt, barazimi do të ishte rezultati më i drejtë i tij. Fitorja në transfertë vazhdon të mbetet një tabu për Kukësin edhe pas javës së 12-të me skuadrën e Marcelo Troisit që pësoi humbjen e 4-t në 6 takime që ka zhvilluar gjithsej jashtë fushës së saj.
Ndërkohë, Tirana është rikthyer te fitorja duke mundur jashtë fushe Bylisin me rezultatin minimal 1-0. Bardheblutë arritën të dalin me kokën lartë falë një supergoli të Bakajt.
Fitore arriti edhe Laçi që mposhti Flamurtarin me rezultatin 2-1, me ekipin vlonjat që e sheh veten gjithmonë e më shumë në vështirësi.
