Java e 14-të e Superiores e ngriti siparin me dy ndeshje, në Ballsh dhe Gjirokastër. Një fitore vendëse dhe një udhëtuese në këtë itinerar, me kampionët në fuqi që bien ndaj Bylisit. Disfata e tretë sezonale kjo për të kuqtë, që humbën edhe një lojtar titullar në këtë transfertë, pikërisht Bruno Telushin, i cili u ndëshkua me karton të kuq. Pra, vlonjati nuk mund të luajë në sfidën e ardhshme.
Trajneri Franco Lerda nuk e llogariti edhe në këtë ndeshje Esat Malën, teksa talenti i ekipit Shpresa është pezulluar nga klubi. Rezultati përfundimtar ishte 2-1 për mallakastriotët, të cilët e gjetën rrugën e rrjetës me anë të Edison Ndrecës (6’), i ndihmuar edhe nga devijimi topit nga Belica, dhe Guido Salion (54’). Për kryeqytetasit barazoi përkohësisht Bardhi (26’). Një hap fals i “demave”, por që nuk e vë në rrezik kreun e renditjes për momentin, edhe nëse Kukësi ndjekës fiton ndaj bardhebluve. Nga ana e tij, Bylisi katapultohet në vendin e dytë për momentin, me dy pikë më pak se kundërshtari që mundi sot.
Në Gjirokastër kanë vendosur golat e Malotës (85’) dhe kapitenit Lika (91’). Një fitore “in extremis” për kuqeblutë, që dalin me tri pikë të arta nga kjo transfertë. Luftëtari, nga ana tjetër, mbetet me të njëjtat :”valenca” fundore, duke qenë kandidatë kryesorë me Flamurtarin për të zbritur nga kategoria. Interesant është fakti se Vllaznia është zhbllokuar pas katër ndeshjesh, kur nuk shënonte dot asnjë gol.
Skuadra shkodrane e sheh veten tashmë në kuotën e 20 pikëve, në pjesën e sipërme të klasifikimit, por duhet të presë ndeshjet e tjera të kësaj jave, për të kuptuar pozicionin real. Ashtu sin ë Ballsh, edhe në Gjirokastër është akorduar një karton i kuq, pikërisht për Cela (85’), ojtarin e skuadrës vendëse. Po ashtu, nuk kanë munguar kartonët e shumtë të verdhë në këtë ballafaqim. Më poshtë mund të shinhi videot e golave të dy ndeshjeve në fjalë:
