Partizani ka korrur fitoren e tretë radhazi dhe shkon me moralin e duhur në përballjen e fundjavës kundër Skënderbeut kryesues. Të kuqte e Starovës, ndryshe nga ndeshjet ndaj Laçit dhe Flamurtarit, shfaqen cinikë dhe i falen golit të njeriut të momentit. Kaleb Ekuban, që shënoi rrjetën e vetëm në këtë sfidë në minutën 33-të duke arkëtuar një trepikësh të artë.
Korabi bën një tjetër 90 minutësh shumë të mirë, por dibranëve u mungon fati edhe ndaj të kuqve, pasi Plaku ndalet edhe njëherë tjetër nga shtylla, mallkim ky që ka zënë Korabin që nga fillimi i kampionatit.Starova do ta nisë takimin me formacionin më të mirë të mundshëm, me të cilët kishte arritur dy fitore më herët ndaj Laçit dhe Flamurtarit, për një golavarazh të përgjithshëm 6-0, ndërsa Mërgjyshi ia beson ish-lojtarëve të kuq, Sebino Plakut dhe Nderim Nexhpit, ofensivën.
Loja do të karakterizohet nga dyluftime të forta dhe do të jetë e përqendruar në mesfushë, por gjithsesi të kuqtë do të jenë fitimtarë në fund të 90 minutëshit. Ky sukses e afron Partizanin me korçarët, pasi të kuqtë ngjiten në kuotën e 17 pikëve pas 8 javësh kampionat, ndërsa Korabi mbetet me 5 pikë, duke zbritur në vendin e parafundit.
