Nga Ilir Çumani
Kush dëshiron anëtarësimin në një parti politike në Shqipëri, është fare e thjeshtë. Po, po! Eshtë shumë e thjeshtë. Kemi plotë, plotë… Mbi 140 parti e partiçka të vockla. Por, me një kusht: Së pari, duhet të njiheni me “manifestin” e tyre, të mësoni 10 cilësitë e çmuara të “idealit” që ato kanë…!
1 – Nëse dëshiron të njohësh një popull të nënështruar dhe një komb që hera herës “noton” i përhumbur në ndërgjegje dhe vetëdije kombëtare, merrni leksione dhe lexoni “manifestin” e partive tona. Ato janë të njëjta dhe nuk ndryshojnë nga njëra tjetra.
2 – Në Shqipëri, partitë politike janë “anestezia” që në mënyrë konstante mbajnë në gjumë letargjik popullin e vet.
3 – Pas 27 vitesh pluralizëm politik, partitë mbetën pjesë e gjenezës së tyre; copëza mbetjesh të mitrës së përgjakur të nënës që i lindi dhe i rriti: Partia e Punës.
4 – Në Shqipëri, partitë janë si bisha të urritura; partiçkat, krijesa po aq të lebetitura e të llahktarisura. Në çdo çast, ato janë të gatshme të hanë edhe krijesën e vet….!
5 – Partitë janë si“fallxhorët”. Ushqimi i përditshëm i tyre janë njerëzit e varfër, turmat lumpiane dhe të dëshpëruara – viktimat e tyre.
6 – Partitë janë lojtarë të shkëlqyer të bixhozit. Letrat dhe gurët e tavllës që ato i luajnë, është populli, i cili historikisht është udhëhequr dhe udhëhiqet nga turmat e verbëra.
7 – Partitë janë si prostitutat “vip”. Gjatë sundimit ato miklohen por, edhe egërsohen, hynë në garë me njëra – tjetrën kush të kafshojë më shumë pjesë nga Atdheu i përbashkët. Pas zgjedhjeve, ato shkëputen nga turmat dhe jetojnë në pallate luksoze, shtrojnë tryeza dreka dhe darka qeveritare nëpër salla mondane, bëjnë diplomaci e pazare të ndyra nëpër resorte e aviona çarter… Kur trokasin zgjedhjet e radhës, sërish “prostitutat vip” zbresin poshtë në turma. Dalin në semafor dhe fshehtas, ato i shkelin syrin njëra – tjetrës për të kapur gjahun e radhës.
8 – Partitë janë “bakterie” të këqia. Ato gjallojnë vrullshëm në trupin e një populli të tërë që dergjet në stratin e të sëmurit kronik në dispancerinë – Atdhe.
9 – Mileti – elektorati, tradicionalisht është i ndarë në parcela mes partive. Mirëpo, gjithmonë të fituara kanë dalë dhe dalin këto të fundit, duke e lënë popullin me gisht në gojë. Deri kur…?!
10 – Për sa kohë do të vazhdohet të tubohet në sheshe e zgërqe të fëlliqura mes moçaleve për partitë dhe partiçkat tona të “ëmbëla” dhe të “dashura”, për aq kohë ato nuk do të kursehen t’ia bëjnë në kokë të gjithë shqiptarëve…!
Nëse ende nuk ke asnjë kundërshti i dashur populli im, shko dhe anëtarësohu… Rrofshin e qofshin partitë mbi të gjitha!
