Koalicionit bëhen për programe dhe jo për tepsinë e pushtetit, tha kryeministri Edi Rama në takimin me elektoratin e Rogozhinës.
“Në gjithë botën bëhen koalicione që nga Gjermania, po koalicionet bëhen për programet dhe jo për tepsinë e pushtetit. Në gjithë botën forcat politike bashkëpunojnë në qeverisje kur nuk i kanë numrat e nevojshëm, ose kur kanë një plan të madh për të ardhmen për reforma të mëdha, por bashkëpunimi bëhet pas zgjedhjeve, duke ulur në tavolinë e duke përputhur programet. Kurse këtu pas çdo zgjedhje mbarojnë punë nëpër Shqipëri, duke marrë vota në këmbim të favoreve apo të premtimeve se do i fusin të gjithë njerëzit në punë shteti, dhe pastaj atje në Tiranë as nuk i intereson fare programi, po copa që do marrin nga tepsia e pushtetit. Dhe tepsia e pushtetit është kusht për të patur qeveri, koalicion, mundësinë që të qeverisësh. por si mund të vazhdohet kështu? Si mund të vazhdohet që siç themi ne, kur është çun e kemi të gjithë, kur është gocë e ka partia e madhe, e ka kryeministri”, tha Rama në fjalën e tij.
Kreu i Partisë Socialiste tha më tej se më 25 qershor merret vendimi për ngritur krye ndaj administratës që e quajti të kalbur.
Rama u shpreh se janë disa parti që marrin vota dhe më pas kushtëzojnë votimin e ligjeve në Parlament duke kërkuar drejtori në zyrat e shtetit.
Kryeministri u bëri thirrje qytetarëve që pavarësisht bindjeve politike, t’i japin PS-së edhe një mandat tjetër qeverisës.
“Marrin votat dhe vijnë në Parlament. Edhe kanë ca numra në Parlament dhe thonë ça do ti. Do të kalojmë ligjin për këtë reformë, edhe thonë unë t’i jap votat e mia po më dhe drejtorin e burgjeve, unë të jap votat e mia po më dhe drejtorin e kuzhinës.
Unë i them dhe socialistëve dhe demokratëve, lërini ndasitë për bindje, të gjithë duhet të shikojmë kush është skuadra që duhet marrë në punë në Shqipëri, kush janë njerëzit që duhen ngarkuar me përgjegjësi për punët”, tha Kryeministri Edi Rama./a.ç
