Nëse në diktaturë rëndom gjeje parrullën ‘Lart frymën revolucionare’, një thirrje të ngjashme ka bërë edhe Lulzim Basha në mbledhjen e sotme të kryesisë.
Burime për JavaNews bëjnë të ditur se kyredemokrati ka kërkuar që militantët të ushqehen deri më 16 mars me frymën antiqeveritare.
“Ne duhet të mbajmë lart te njerëzit frymën anti-qeveri. Atyre duhet t’u bëhet e ditur se me Ramën në krye nuk ka demokraci. Duhet të nisim të krijojmë elitën në çdo fushë dhe kjo elitë të përfshihet në protestat tona” – mësohet të ketë thënë Lulzim Basha.
Ai ka ripërsëritur parrullën se opozita nuk pranon qeveri të kapur nga krimi. Sipas kryetarit të Partisë Demokratike, largimi i qeverisë është një emergjencë kombëtare dhe kjo duhet t’u bëhet e ditur pjesëmarrësve në tubimin e 16 marsit.
Në të njëjtën linjë kanë qenë edhe Kryesia, ndërsa është kërkuar që për Ramën të mos ketë asnjë minutë qetësi.
Më herët, anëtarët e opozitës janë porositur për një pjesëmarrje sa më të madhe në tubim, kryesisht duke transportuar militantë nga rrethet drejt Tiranës.
/javanews/A.Rada
