Të gjitha kompanitë dhe punonjësit e tyre që do të jenë pjesë e “Durana Tech Park” në Xhafzotaj të Durrësit nuk do të paguajnë tatim mbi fitimin apo për të ardhurat personale për të paktën 10 vite. Gjithashtu, sipërmarrjet në fushën e teknologjisë do paguajnë kontribute shoqërore për të punësuarit në jo më shumë se 95 euro në muaj.
“Parku teknologjik Durana sjell zhvillim ekonomik për Shqipërinë. Është një pol zhvillimi rajonal. Nga Durana presim të përfitojmë investime të huaja, prodhim të vlerës së shtuar, transferim të dijeve si dhe kthim të start-up në biznese të mirëfillta që krijojnë mundësi punësimi dhe aftësimi”, tha Blendi Gonxhja, ministër, MEKI.
Pjesë e “Durana Tech Park” ndërkohë veç kompanive mund të bëhen pjesë edhe universitetet, q qendrat kërkimore, “start up” dhe nomadët digjitalë.
“Durana është më shumë se një park, është një platformë që mbështet teknologjinë, nomadet digjital dhe start up. Ky hap e pozicionon Shqipërinë në hartën globale të inovacionit. Deri tani kanë shprehur interesin për të qenë biznese pjesë e Duranes 50 kompani”, tha Elira Kokona, Drejtoresha e Korporatës Shqiptare të Investimeve.
Përmes këtij parku, synohet krijimi i mundësive të reja për punësim dhe aftësim profesional dhe kthimi i autostradës Tiranë-Durrës në një pol rajonal të zhvillimit teknologjik.
“Durana Tech Park ofron hyrje pa vizë në territorin e Shqipërisë dhe një leje qëndrimi pesëvjeçare për punonjësit, me mundësinë e marrjes së shtetësisë shqiptare pas pesë vitesh. Ky përfitim është veçanërisht i favorshëm për kompanitë e huaja dhe nomadët dixhitalë që kërkojnë një proces të thjeshtë dhe një integrim pa pengesa mes punës dhe jetesës”, tha Enkelejd Musabelliu, zëvendësministër, MEKI.
“Për më tepër, me kosto jetese deri në 40% më të ulëta se mesatarja e BE-së, Shqipëria ofron një mundësi të mirë jetese për punonjësit ndërkombëtarë, duke e bërë Durana Tech Park një destinacion ideal për bizneset globale dhe profesionistët e teknologjisë”, tha Sokol Duma, zëvendësministër, MEKI.
Thirrja për aplikime për përdoruesit e parë të parkut u hap të martën, ndërsa pritshmëritë janë që fituesit e parë të konfirmohen deri në fundin e muajit prill.
