Ka një përpjekje për të ngacmuar vëmendjen e publikut, për ndërtimin e një parkingu nëntokësor tek parku Rinia. Në fakt bëhet fjalë për rikthimin e një projekti të vjetër, i cili parashikonte ngritjen e dy parkingjeve nëntokësore, tek ky park, si dhe në sheshin “Italia”.
Historia tashmë dihet: për katër vjet, pas vitit 2011, nuk u hodh asnjë tullë në këto dy projekte, megjithëse Lulzim Basha i pati premtuar ato gjatë mandatit të tij. Në të kundërt, ajo që u pa, ishte se firma që fitoi tenderin e parkingut nëntokësor tek sheshi “Italia”, faktikisht ngriti një parking mbitokësor me llamarina, duke shkatërruar komplet shtresën e pllakave të këtij sheshi historik dhe duke ndërprerë abuzivisht qarkullimin në atë zonë, të kthyer me forcë në parking me pagesë. Shumëkush e mban mend atë hapësirë pluhuri e balte që u krijua në njërën nga nyjet historike më të njohura të Tiranës.
Përse asokohe, shoqatat dhe analistët që sot bërtasin për parkingun nëntokësor të parkut Rinia, nuk thanë asnjë fjalë por vetëm heshtën?! Ku ishin ata që u dhimbsej qyteti, teksa sheshi “Italia” u rrethua me llamarina dhe u mbulua me pluhur e baltë?!
