Dy ekspertët kryesorë të motit në Hungari u pushuan nga puna pasi parashikimi i tyre i gabuar shkaktoi zhurmë politike.
Ajo që ishte cilësuar si “shfaqja më e madhe e fishekzjarreve në Europë” ishte organizuar për t’u zhvilluar mbrëmjen e së shtunës, për të festuar Ditën e Shën Stefanit, festë kombëtare në këtë vend.
Por 7 orë para se të niste, qeveria e shtyu eventin, duke cituar parashikim ekstrem të motit.
Si për ironi, moti ishte i qetë, duke çuar kështu në pushimin nga puna të kreut dhe zëvendësit të tij nga shërbimi meteorologjik.
Sipas asaj që shkruan BBC, plot 40 mijë fishekzjarre ishin parashikuar për t’u lëshuar nga 240 pika të ndryshme në një shtrirje prej 5 kilometrash në lumin Danub, në Budapestin qendror, një shfaqje që zakonisht shihet nga më shumë se 2 milionë njerëz.
Qeveria e shtyu eventin për një javë, për shkak të parashikimeve që kishte marrë për mot ekstrem.
Por stuhia e shiut që Shërbimi Meteorologjik Kombëtar kishte parashikuar ndryshoi drejtim dhe preku pjesë të Hungarisë lindore, duke mos iu afruar fare kryeqytetit.
Vetë shërbimi kërkoi ndjesë publikisht të dielën duke shpjeguar se kishte ndodhur ajo që kishte më pak gjasa të ndodhte dhe tha se pasiguria është pjesë e parashikimit të motit.
Por ishte tepër vonë.
Të hënën, Ministri i Inovacionit, Laszlo Palkovics pushoi nga puna krerët e shërbimit.
Reagimet në Hungari ishin mikse.
Rreth 100 mijë persona kishin nënshkruar një peticion ku kërkonin anulimin e shfaqjes së fishekzjarreve në një kohë kur Ukraina fqinje është në luftë dhe vetë vendi i tyre përballet me kufizime.
Nga ana tjetër ama, mbështetësit e qeverisë u zemëruan shumë me parashikimin e gabuar dhe shpresojnë që kjo shfaqje të mbahet të shtunën e ardhshme, siç është planifikuar.
/a.r
