Policia e Durrësit ka vënë në pranga një maqedonas dhe ka nisur procedim ndaj një tjetre, pasi u janë gjetur dokumente të falsifikuara të Europol të cilat u janë sekuestruar.
Sipas policisë, është ndaluar Zore Lozanovski 45-vjeç dhe ka nisur procedimi për Bilina Nancovska 35-vjeçe që të dy nga Manastiri në Bitol të Maqedonisë, pasi në lagjen Nr.13, Durrës, Lozanovski në momentin që është ndaluar nga punonjësit e policisë të rendit publik ka paraqitur dokumenta të ngjashme si të Europolit.
Gjatë kontrollit të ushtruar iu gjetën dhe sekuestruan 1 pasaportë diplomatike me mbishkrimin Knights of Malta dhe disa karta me mbishkrimet “Europolice Federation”.
Policia e qytetit bregdetar shton se Zore Lozanovski është person me precedent penalë të mëparshëm po për të njëjtat vepra penale.
shqiptarja.com/d.i.
