Ministri i Punëve të Brendshme, Besfort Lamallari, u shpreh se rreziku më i madh që mund t’i kanoset sigurisë së një vendi është krijimi i perceptimit të gabuar se është një vend i pasigurt.
Në një konferencë për shtyp, Lamallari u shpreh se Shqipëria nuk e ka luksin të perceptohet si vend i pasigurt, ndërsa shtoi se pasiguria më e madhe krijohet nga lufta hibride dhe agjenda të caktuara politike.
“Policia e Shtetit tashmë ka ngritur kapacitetet e nevojshme për t’ju përgjigjur kërcënimeve të ndryshme që mund të vijnë edhe në forma hibride, edhe ato që zhvillohen përmes dezinformimit në rrjetet sociale apo metoda të ndryshme që mund të përdorin për të krijuar destabilitet ose përshtypje të një vendi të pasigurt dhe ky është dëmi më i madh që mund ti bëhet një vendi pasi ne nuk kemi kohë apo luksin që të perceptohemi si një vend i pasigurt qoftë kjo kur vjen nga lufta hibride apo nga agjenda të caktuara politike. Çdo përpjekje që synon të krijoj një imazh të gabuar të Shqipërisë është në dëm të ekonomisë shqiptare dhe turizmit”, u shpreh ministri.
Duke folur për njoftimin publik të Ambasadës Amerikane se mund të ketë sulme të mundshme nga Irani në vendin tonë, Lamallari tha se ka kërkuar informacion nga strukturat përkatëse të Policisë së Shtetit lidhur me masat e marra dhe komunikimet me përfaqësues të ambasadës.
Lamallari theksoi se, sipas komunikimeve me zyrën e sigurisë së ambasadës, bëhet fjalë për një lajmërim standard që është bërë edhe në vende të tjera të BE-së dhe më gjerë.
“Duke marrë parasysh reagimin publik të ambasadës sigurisht që kërkova nga struktura përkatëse të Policisë së Shtetit, përfshirë edhe drejtorinë antiterror, policinë kriminale si dhe sigurinë publike për të më informuar me masat që kishin marrë dhe lidhur me komunikimet që kanë pasur me përfaqësues të ambasadës. Nga informacioni i përcjellë nga ana e tyre nga komunikimet që kam pasur me përfaqësues së zyrës së sigurisë së ambasadës është konfirmuar se ky është një lajmërim standard që është bërë edhe në vende të tjera të BE dhe më gjerë”, tha ai.
