“Brenda muajit nëntor do të shpall para shqiptarëve një plan të posaçëm për gjithë personat me precedent kriminal”, deklaroi sot kryeministri Edi Rama.
I ftuar në një studio televizive, Rama tha se “nuk bëhet fjalë për personat në politikë, pasi në politikë e kemi bërë“.
“Bëhet fjalë për persona të skeduar si persona të përfshirë në aktivitete kriminale, të cilëve do t’ju rezervojmë një trajtim shumë i veçantë që nuk i shkon mendja askujt”, tha Rama.
Sipas tij, “kjo gjë që do të bëjmë tani, ka ardhur koha të bëhet dhe është mundësia të bëhet sepse Policia e Shtetit sot i ka fituar të gjitha ato hapësira në terren”.
“Të dhënat thonë se situata e sigurisë nuk ka krahasim dhe është vendosur baza tani për të bërë këtë ofensivë të re në raport me këtë kategori njerëzish. Por ama nëse shohim të gjitha të dhënat e krimit në Shqipëri, nuk ka krahasim sot me më parë. Kemi më shumë se përgjysmim të vrasjeve”, tha Rama.
/a.r
