Pas fjalë së tij në parlament, Sali Berisha tha jashtë sallës së seancave plenare se grupi parlamentar i PD-së i ka lënë të hapura opsionet e saj, duke përfshirë edhe variante më të rënda se bojkoti i parlamentit. Kështu ish kryeministri ka paralajmëruar për një destabilitet të mundshëm politik, nëse nuk gjendet konsensusi për dekriminalizimin dhe largimin e menjëhershëm të deputetëve të inkriminuar.
“Dekusarizimi i parlamentit është kusht themelor për funksionimin e tij. Dje në mbledhje grupi është marrë vendim që është shpallur tashmë. Unë mendoj se grupi ka lënë të hapur opsione edhe më të rënda se bojkoti”, tha Berisha.
Pak më parë në sallën e parlament, ish Kryeministri u shpreh se me ardhjen e Armando Prengës javën e shkuar në seancën plenare, maxhoranca tregoi fytyrën e saj të vërtetë, atë të krimit. Në fjalën e tij Berisha tha ndër të tjera se ky “rikthim i kriminelëve” mund ta çojë vendin në një konkflitk të hapur.
“Parlamenti i vendit njohu javën që kaloi tronditjen e tij më të madhe në histori. Rikthimi i kriminelëve në Kuvend mund ta çojë vendin në një konflikt të hapur dhe të gjerë. Ky ishte provokimi më i ulët që ju ia bëtë opozitës, duke sjellë vrasës në Parlament për të votuar ministrat tuaj. Është një akt që detyron çdo deputet të opozitës të mendojnë për një zgjidhje përfundimtare”, tha Berisha.
