PD-ja kërcënon se do t’i drejtohet popullit që të rrëzojë Kuvendin në rast se miratohet Reforma në Drejtësi, kur 91% e popullit do Reformën në Drejtësi. Nuk ka më situatë paradoksale në të cilën ndodhet sot PD-ja, situatë në të cilën e kanë zytur vetëm interesa personale të lidershipitë saj dhe aspak ato në interes të vendit, gjë që e detyron të bëjë nga këto deklarata.
Vetëm pak më parë nënkryetari i komisionit të posaçë parlamentar, Oert Blykbashi, në një prononcim për mediat renditi edhe një herë kushtet e opozitës për miratimin e Reformës në Drejtësi. Tek e dëgjon z. Bylykbshi të stërthotë të njëjtat gjëra, natyrisht kupton se është në të drejtën e PD-së që të përpiqet që të shkepë sa më shumë llokma nga Reforma në Drejtësi. Por kur e dëgjon më pas të trashë zërin e të thotë se PD-ja do t’i drejtohet popullit se çfarë do të bëjë me Parlamentin nëse miratohet Reforma në Drejtësi, kjo deklaratë, natyrisht, e bën atë të duket në pozita aspak serioze. Deklarata e tij është kërcënuese, gjë që lë të kuptosh se PD-ja kërcënon për pazare, pasi në të vërtetë 91% e popullit do një Reformë në Drejtësi, që të shembë këtë sistem të kalbur deri në palcë.
Z. Basha kërcënon për djegije mandatesh, duke aluduar që më pas që era shkrumbit mund të ndjehet edhe në të gjithë Shqipërinë. Z. Bylykbashi kërcënon me popullin që do t’i sulet Parlamentit. Z. Berisha kërcënon me destabilizim të plotë. Në fakt këto kërcënime janë aq primitive se vetëm një gjë kupton se u ka mbetur ora në shekullin që lamë pas, pa kuptuar fare se kohët kanë ndryshuar dhe se gjuha e kërcënimit është mënyra më e shpifur e të bërit politikë. Në fakt nuk bëjnë dot asgjë. Absolutisht asgjë. Populli do që ky sistem i kalbur drejtësie të rrëzohet një orë e më parë. Dhe natyrisht atë nuk e mbajnë dot më në këmbë as kërcënimet e Berishës, as të Bashës, e lë më këto të Bylykbashit.
