Papunësia ka zbritur në 10.2% këtë vit. Në raport me vitin e kaluar, ajo është ulur 1% dhe në një krahasim disavjeçar, ka pasur tkurrje graduale.
Edhe në krahasim me rajonin, norma e papunësisë rezulton ndër më të ulëtat në rajon, pas Serbisë e cila regjistron një normë nën 10%.
Zhvillimi i ekonomisë në rajon, duket se shfaq prirje të njëjtë në të gjitha shtetet në Ballkanin perëndimor, por kjo mund të mos jetë e vetmja arsye pse ka më shumë vende pune në raport me popullsinë.
Në relacionin e buxhetit të vitit të ardhshëm, thuhet se “në përputhje me përshpejtimin e aktivitetit ekonomik, punësimi mesatar vjetor në Ballkanin Perëndimor u rrit në 2.5%, ndërkohë që edhe pjesëmarrja e fuqisë punëtore pati rritje. Në përgjithësi, normat e papunësisë në rajon mbetën në nivelet më të ulëta historike, por krahasimisht më të larta me vendet e BE-së”.
Pra, përveç rritjes ekonomike, faktor mbetet edhe emigrimi. Me afro 35 mijë vetë qe largohen çdo vit, dhe një pjesë e madhe e tyre janë në moshë pune, niveli i papunësisë bie automatikisht.
