Papa Françesku bëri sot thirrje Kolumbisë për t’iu shmangur çdo forme tundimi për hakmarrje dhe për të kërkuar paqen “në mënyrë të pareshtur”, gjatë fjalimit të parë në vizitën e tij në këtë vend që po orientohet drejt paqes pas më shumë se një gjysmë shekulli në luftë.
“Kërkimi i paqes është një mision ende i papërfunduar, një detyrë e vazhdueshme dhe që kërkon angazhimin e të gjithëve”, deklaroi papa në Bogota, para autoriteteve të sferës politike dhe fetare duke bërë thirrje për t’iu larguar çdo forme ngasje për hakmarrje.
Në këtë fjalim të mbajtur në prani të 700 personave të mbledhur në sheshin e Armëve të pallatit presidencial “Casa de Nariño” papa në një vizitë pesë ditore ka inkurajuar kolumbianët për të bërë përpjekje kundër çdo akti në formë hakmarrje dhe të mbeten në kërkim të interesave specifike dhe afatshkurtra.
Duke theksuar se shoqëria nuk përbëhet vetëm nga disa me “gjak blu” por nga të gjithë, ai pohoi se më e vështirë është rruga që të çon drejt paqes dhe marrëveshjes, aq më shumë duhet të angazhohemi për të njohur personin përballë, për të shëruar plagët dhe për të ndërtuar ura, për të forcuar lidhjet dhe mbështetur njëri-tjetrin reciprokisht./b.d
