Gazeta Panorama shkruan sot se me firmë të kryeministrit Edi Rama, më 9 shtator të këtij viti ai ka firmosur lejen e ndërtimit të pallatit 13 katësh te Liqeni Artificial. Bëhet fjalë për kompleksin e shumëdebatuar, i cili ngjalli edhe protesta sporadike të shoqërisë civile.
Panorama thotë se leja është dhënë në hyrje të Liqenit, përballë Fakultetit Ekonomik, ndërsa për këtë sjell edhe një faksimile të firmës së Ramës mbi miratimin e lejes ndërtimore.
“Kjo nuk është firma e vetme. Në këtë dokument janë miratuar edhe 5 leje të tjera për ndërtime në Tiranë. Këto ndërtime variojnë nga 4 deri në 10 kate” – shkruan Panorama, e cila thekson se këto janë të gjitha godina banimi dhe shërbimesh.
Ndërtimet në fjalë kanë qenë të miratuara më parë nga Bashkia Tiranë në kohën kur ky institucion drejtohej nga Lulzim Basha, por ato ishin pezulluar pasi nuk kishin marrë miratimin e KKT.
