Një kope me ujqër të uritur kanë zbritur në fshatin Karicë në njësinë administrative Baz të bashkisë së Matit. Kafshët e egra kanë sulmuar bagëtitë, ndërsa banorët shprehen të frikësuar për fëmijët e tyre.
Në videon e publikuar nga Balkaweb, shihet një ujk i shtrirë i ngordhur që e kishte vrarë fshatari, pasi kafsha kishte sulmuar bagëtitë e këtij të fundit.
Një prej banorëve tregon se tashmë kanë dy muaj që dhjetëra ujqër të uritur zbresin në fshat dhe sulmojnë bagëtitë, por që frikësohen për fëmijët.
Ai tregon se ujku në video është më i vogli pasi të tjerët janë super të mëdhenj.
“Kemi frikë për fëmijët më shumë se për bagëtitë. Për bagëtitë ata do vijnë të hanë një dhe do ikin, ndërsa fëmijët janë trembur. Ky është vetëm një këlysh i vogël, por prej dy muajsh zbresin dhjetëra ujqër të uritur dhe sulmojnë fshatin. Normale, kemi frikë,”- dëgjohet të thotë ai, teksa më tej kërkon që qeveria të marrë masa, pasi fëmijët në këto kushte nuk shkojnë dot në shkollë.
I gjithë qarku i Dibrës është sulmuar shumë herë nga ujqërit, që sipas gazetarit Enver Doçi vijnë nga Maqedonia e Veriut.
g.kosovari
