Pasojat post Covid nuk janë vetëm te të rriturit, por edhe te fëmijët. Mjeku pediatër Bektash Mandri shprehet se edhe pse të rralla, ka patur raste që fëmijët kanë shfaqur hipertension pasi janë infektuar nga Covid-19.
“Covidi nuk është një gjëndje virale, një virus si gjithë të tjerët, është një virus që e skanon organizmin nga koka tek këmbët dhe shikon atje ku ke një deficencë në organizëm, atje ngulmon dhe atje të lë klinikën. Kemi pasur me probleme renale, jo ndonjë problem të parikuperueshëm. Infeksione të gojës apo të grykës kanë qenë jashëzakonisht të larta dhe infeksione që kanë dashur një kohë të gjatë që të rikuperohen. Covidi edhe pasi kalon, do një kohë prej 3 deri në 6 muaj që organizmi të rikuperojë gjendjen e tij fillestare”, është shprehur pediatri.
Ndryshimet e motit, me mëngjese dhe mbrëmje me temperatura të ulëta, kanë sjellë edhe shtim të virozave. Por sipas mjekut, prindërit drejtohen te pediatri me vonesë, duke bërë që fëmija të ketë nevojë për trajtim më të gjatë mjekësor.
“I sjellin në një stad të mëvonshëm, ku rezultati i rënies së imunitetit nga gjendja virale, mbivendoset edhe infeksioni bakterial dhe ne jemi të detyruar që t’i japim antibiotikë. Ditët e fundit kemi patur goxha të infeksionit të rrugëve të poshtme aspiratore që janë bronkitet dhe bronkolitet që nuk janë karakteristikë në këtë periudhë, por të gjithë janë fëmijë që sillen me vonesë në qendrën mjekësore, sillen minimumi 7-10 ditë pasi ka filluar problematika e fëmijëve”, është shprehur mjeku.
Mjeku u bëjnë apel prindërve të bëjnë kujdes edhe me ushqimin e fëmijëve. Ai këshillon sa më pak ushqime të gatshme dhe pije me gaz./ b.h
