Ministri i Bujqësisë, Zhvillimit Rural dhe Administrimit të Ujrave, Edmond Panariti, udhëtoi sot drejt Vlorës, konkretisht për në Urën e Mifolit, ku Lumi Vjosë është në nivelin maksimal të tij, ndërsa në orët në vazhdim, pritet rritje e prurjeve.
Ministri i Bujqësisë iu kërkoi familjeve dhe bizneseve në zonën e shtratit të Lumit të Vjosës, që të largohen, me qëllim që jetët e njerëzve të mos rrezikohen, derisa situata meteorologjike të përmirësohet.
“Në 12 orët e ardhshme pritet rritje e madhe e prurjeve të lumit Vjosa, ndaj iu bëj thirrje të gjithë banorëve të zonës dhe atyre që kanë biznese këtu, që të largohen për orët në vazhdim”, deklaroi Panariti, duke shtuar se, “angazhimi ëhstë maksimal i të gjitha strukturave, të cilat janë në gatishmëri të plotë dhe të mirëkoordinuara dhe të gjithë bashkë, dhe në radhë të parë, ne të gjith duhet të mbrojmë e shpëtojmë jetë njerëzish, padyshim edhe ekonomitë familjare”, tha Panariti.
Më tej, Ministri i Bujqësisë, duke shpresuar për një situatë jo të rënduar, deklaroi se, 10 ndërhyrje të bëra nga Mininistria e Bujqësisë në argjinaturën e Vjosës, do të zbusin vërshimin e ujrave drejt banesave dhe tokave bujqësore./a.m.
