Ministri i Bujqësisë Zhvillimit Rural dhe Administrimit të Ujërave, Edmond Panariti bashkë me kandidatin e “Aleancës për Shqipërinë Europiane” për kryetar të Bashkisë së Kuçovës, Selfo Kapllani bashkëbiseduan me banorë të komunave Lumas, Kozare dhe Perondi.
Gjatë këtyre takimeve Ministri i Bujqësisë, Zhvillimit Rural dhe Administrimit të Ujërave, z. Edmond Panariti tha se zhvillimi i bujqësisë do të ketë një impakt të drejtpërdrejtë edhe në zhvillimin e gjithë vendit.
“Pavarësisht se kriza e fqinjëve tanë e grekëve na dëmtoi në kuptimin që ranë të ardhurat që sjell emigracioni, pati një efekt të mirë që e kuptuam që toka nuk të tradhton kurrë, toka është aty, toka prodhon, të garanton një jetë dinjitoze dhe me pak mençuri dhe me mbështetjen e shtetit dhe të mekanizmave të tjerë, mund të të bëjë edhe të pasur” – tha z. Panariti.
