Një operacion i policisë së Tiranës i koduar “Designer”, ka vënë në pranga një djalë të ri, i cili dyshohet se është autori i vjedhjes së një institucioni financiar që jepte kredi.
Efektivët e komisariatit nr.2 nga hetimet e kryera lidhur me ngjarjen e së martës, kanë zbardhur vjedhjen me dhunë të një sasie parash, në një nga filialet e një institucioni financiar për kredidhënie në shuma të vogla, ndodhur më datë 7 janar .
Në cilësinë e provës materiale është sekuestruar një biçikletë, me të cilën i dyshuari u largua nga vendngjarja dhe një sasi prej 45 mijë lekësh të rinj.
Efektivët e policisë, pas ngjarjes së ndodhur mbrëmjen e datës 7 janar 2020, ku një person vodhi me dhunë një sasi lekësh, në një zyrë kredidhënieje në shuma të vogla, organizuan punën dhe nën drejtimin e prokurorisë, duke përdorur metodat proaktive, bënë të mundur që brenda një kohe të shkurtër të identifikohej autori i kësaj ngjarjeje.
Në bazë të provave të grumbulluara, u organizua dhe finalizua operacioni i koduar “Designer”, në kuadër të të cilit u bë e mundur kapja dhe arrestimi i D. K., 28 vjeç, banues në Tiranë.
I riu akuzohet se rreth orës 18:30 të së martës ka shkuar në rrugën “Medar Shtylla”, në filialin e një institucioni financiar dhe me anë të ushtrimit të dhunës me një shkop metalik, i ka vjedhur punonjësve të këtij filiali një shumë prej 60 mijë lekësh të rinj dhe dy aparate celular.
Gjatë kontrollit në banesë, policia gjeti dhe sekuestroi në cilësinë e provës materiale një biçikletë, me të cilën u largua pasi kreu vjedhjen, si dhe një shumë prej 45 mijë lekësh të rinj.
Ndaj të dyshuarit hetimet janë në vijim, ndërkohë që materialet iu referuan Prokurorisë së Tiranës, për veprën penale “Vjedhja me dhunë”.
/a.r
