Rëndohet edhe më tej bilanci nga tërmeti shkatërrimtar në Italinë qëndrore.
Numri i viktimave ka shkuar në 38 persona nga tërmeti prej 6.2 ballë i shkallës Rihter që ka goditur sot, në orët e para të mëngjesit qytezën italiane Amatrice. Po ashtu, bëhet me dije se mbi 150 persona janë zhdukur nën rrënoja..
Kryetari i kësaj komune, Sergio Pirozzi ka thënë se shumë njerëz të tjerë janë të bllokuar nën gërmadha. Sipas tij e gjithë zona është ktheyr në gërmadhë.
“Rrugët janë të bllokuara. Gjysma e qytetit është zhdukur”, ka thënë kryetari i kësaj komune, Sergio Pirozzi.
“Ka njerëz që janë të bllokuar nën gërmadha… Ka pasur rrëshqitje të dheut dhe ura mund të rrëzohet”, ka shtuar tutje ai.
Agjencia për Mbrojtje Civile në Itali ka thënë se tërmeti ishte “i rëndë” dhe ka pasur raportime për dëme edhe në zonat malore. Në Facebook është shkruar se në malin Gran Sasso një pjesë e madhe e shkëmbit është shembur gjatë tërmetit.
“Kemi lajme për të lënduar dhe për shkatërrime të ndërtesave”, ka thënë kreu i kësaj agjencie, Frabrizio Curcio.
Tërmeti ra në orën 3:36 min. 76 km në liglindje të qytetit të Peruxhias, në një thellësi shumë të cekët, 10 km, tha ISGS.
Në Romë, disa ndërtesa janë shkundur nga lëkundjet për 20 sekonda, sipas gazetës La Republicca.
Ndërkohë, policia njoftoi se dy persona kishin vdekur afër fshatit Pescara del Tronto, sipas RAI.
Ky tërmet është ndjerë edhe në qytetin e Romës dhe epiqendra e tij ishte afër l’Aquila, ku një tërmet prej 5.9 shkallë të Rihterit vite më parë kishte lënë të vdekur 309 persona.
Curcio ka shtuar se tërmeti i fundit ishte i rëndë dhe për nga intensiteti mund të krahasohet me tërmetin që vite më parë goditi l’Aquila, por tërmeti i sotëm mund të jetë më pak vdekjeprurës për shkak se ka goditur një zonë më pak të banuar.
Qytetet më të prekura nga ky tërmet janë Accumoli, Amatrice, Posta dhe Arquata del Tronto./a.m.
