Kreu i Grupit Parlamentar të Partisë Demokratike Edi Paloka ka vazhduar ditën e sotme akuzat ndaj qeverisë që sipas tij ka organizuar sulmin me karrige ndaj kreut të PD Lulzim Basha dje në Ersekë.
Nga foltorja e Kuvendit, Paloka u shpreh se autori i ngjarjes është një person i lidhur me PS dhe me hallkat e shtetit. Sipas Palokës kjo nuk është hera e parë që qeveria kërkon që t’i mbyllë gojën opozitës duke kujtuar kërcënimet ndaj Bashës.
“U quajt sherr midis vetë militantë të PD ndërkohë që personazhi që ka kryer aktin është jo vetëm militant i PS por i lidhur në hallka të ndryshme të pushtetit. Pati reagime zyrtare të turpshme pro që tregojnë se kush janë ata që e kanë orkestruar. U tha se ai ka dashur të qëllojë xhaxhin e tij, akte të tilla tregojnë se kjo qeveri, kryetari i kësaj qeverie, ka nisur një rrugë që vetëm në drejtimin e duhur nuk është. Për fat të mirë nuk ishte duke folur ende lideri i opozitës. Me këto akte vënë përballë një realiteti që nuk i pëlqen e dinë qe në 21 qershor do të përballen me revoltën qytetarë dhe për këtë arsye po bëjnë cdo përpjekje edhe me dhunë.” tha Paloka
Nga ana tjetër, Meta iu bashkua shqetësimit duke shtuar se duhet të merren masa më të ashpra ndaj personave përgjegjës.
“Edhe unë do doja të bashkohesha me këtë shqetësim. Nuk dua të vë në diskutim që ka ndodhur një ngjarje e rëndë përderisa është konfirmuar nga PD që organizoi mitingun, besoj se të gjithë jeni dakord që të merren masat më të ashpra ndaj personave përgjegjës dhe cdo akt tjetër që cenon rregullat e një fushate të ndershme dhe që cenon të dëmtojë cdo qytetar aq më tepër kur bëhet fjalë për aktivitete të tilla.” tha ai
Redaksia Online
(JavaNews.al)