Kryetari i Grupit të Deputetëve demokrat Edi Paloka ka akuzuar sërish nga foltorja e Parlamentit kryeministrin Edi Rama se provokon krimin. Këtë deklaratë Paloka e dha teksa përsëriti edhe njëherë thirrjen e opozitës për miratimin e amendamenteve për dekriminalizimin.
“Dy ditë më parë, kryemisnitri francez doli në një deklaratë publike për të shpallur që Benzema, futbollist lojtar që luan me Realin e Madridit, nuk mund të luajë me koëbatren sepse është i akuzuar, jo i dënuar, i akuzuar se i ka bërë shantazh një kolegu të tij. E përmenda për të bërë diferencën mes asaj që pretendojmë të shkojmë dhe asaj që na con kryeministri ynë. Nuk ka qytet ku mos të dëgjosh për zyra drejtuesish që nuk dinë të shkruajnë as emrin e tyre. Të gjithë kanë nga një gjë, kanë CV të pasur kriminale. Nuk ka si të jetë ndryshe kur kemi një kryeministër që çdo ditë promovon krimin”, tha Paloka.
Referuar letrës së ministrit të brendshëm Saimir Tahiri për lirimin e një personi të ndaluar me armë pa leje, Paloka tha se krerët e mazhorancës veprojnë me dy standarte.
“Para disa ditësh ministri ishte shumë i revoltuar për një gjyqtar që lironte një të ndaluar me armë. Po nuk u shqetësua ky ministri ditën kur një nga këto gjykata liroi një dpeutet të mazhorancës i cili jo vetëm akuzohet për armëmbajte pa leje, por me këtë armë ka plagosur qytetarë të këtij vendi. Nuk u shqetësua as minsitri as kryeministri, se ishin ata që i bënë presion gjyaktës. Amendamenti që ne kemi sjellë lidhur me këtë cështje lidhet pikërisht me një nga këto raste. Çfarë kërkon amendamenti ynë, që zyrtarë, deputetë të cilët janë kapur në flagrancë me krime të rënda ndaj njeriut, mos të vazhdojnë të kryejnë funksionet e tyre. Nuk e di a ka njeri normal të mos i dal kundër këtij amendamenti veç Edi Ramës”, tha më tej Paloka.
