Ashtu siç është bërë e zakonshme tashmë prej mbi 25 vitesh, Kuvendi i Shqipërisë në çdo seancë karakterizohet nga debate dhe akuza të forta mes palëve. Këtë radhë në qendër të replikave ka qenë Kreu i Grupit Parlamentar të PD Edi Paloka dhe Kreu i Kuvendit Ilir Meta.
Në fjalën e tij, Paloka e ka cilësuar Ramën si një hipokrit të i pafytyrë dhe si më i shpifuri i shpifarakëve pasi u ka dhënë urdhra drejtorëve që i kanë nxjerrë bojën të vjedhin votën e shqiptarëve.
“Jo më larg se dy ditë më parë kryeministri është kapur në flagrancë duke shkelur ligjin, duke mashtruar. Doli një material që tregonte se si ky hipokrit i pafytyrë që deri dje bërtiste, iu jep urdhra drejtorëve të administratës jo të bëjnë fushatë por të vjedhin votat e shqiptarëve. U përpoq të mashtrojë ditën e parë, janë mashtrime. Dhe unë jam një ata shpifësit ky, më i shpifuri i shpifarakëve, mashtruesi më i neveritshëm. Çfarë tha kryeministri me gojën e tij: Janë disa drejtorë që na kanë nxjerrë bojën, por këta tani e kanë mundësinë dhe rastin të plotësojnë kreditet e tyre duke vjedhur votat e shqiptarëve. Dhe këta mund t’ju kërkokan votën shqiptarëve, si mundet t’ja kërkojnë votën kur u ka dalë boja. Bëhet fjalë për vjedhjen e votave të shqiptarëve. E dëgjoni si thotë, nuk janë zgjedhje politike, mos e shprehni revoltën prisni thotë. Votoni për Erjonin, votoni për hasanët.” tha Paloka
Por pikërisht përmendja e kreut të bashkisë së Kukësit Hasan Halilaj ka sjellë edhe reagimin e Metës, i cili e ka “marrë” në mbrojtje duke i kërkuar që provat le t’i çojë në Prokurori.
“Të gjitha provat çojini në Prokurori. Ne mbështesim prokurorinë për të dënuar ata që shkelin ligjin. Për këtë gjë, edhe për ata që vodhën lekët e Ujësjellësit. Hasani nuk pranoi ta merrte në dorëzim Ujësjellësin dhe sot Kukësi nuk ka ujë, nga ujësjellësi yt. Pyet Kukësin, ku janë ata që firmosën Ujësjellësin e Kukësit. Hasani iku dy muaj para se të ikje ti si ministër i brendshëm.” tha Meta
Redaksia Online
(JavaNews.al)
