Një ngjarje e rëndë ka ndodhur këtë të enjte para Gjykatës së Apelit në Vlorë ku dy persona kanë mbetur të lënduar pas një konflikti masiv ku janë përfshirë rreth 10 persona.
Ngjarja ndodhi para përballjes në gjykatë mes palëve. Bëhet fjalë për një konflikt mes disa fshatarëve nga Selanica dhe përfaqësuesve të një firme e cila ka një biznes gurore në zonë.
Pronarët e tokës aty pranë refuzojnë mjetet e firmës që të kalojnë. Sot ku gjykata do të jepte vendimin, palët janë përfshirë në konflikt me sende të forta.
Raportohet se policia ka shoqëruar dy persona në komisariat, të cilët pretendojnë pronësinë mbi tokën ku kalojnë mjetet e firmës.
Ndërkohë, përfaqësuesi i firmës Ylli Salla, thotë për mediat se banorët i kanë zënë pritë dhe e kanë goditur me sende të forta.
“Na goditën me thika, me sëpatë, personat që ishin në gjyq, kunetërit e Bernard Caushajt me bandën e tij nga Selenica, unë jam përfaqësues i një biznesi gurore, jam në proces gjyqësor, kemi dy vite që kemi pezulluar punën jemi në proces. Këta na kanë bllokuar rrugën nuk na lënë të kalojmë. Ngjarja ndodhi sa zbritëm nga makina, jashtë sallës, na kishin zënë pritë, na goditën me doreza, hunj”, tha njëri prej të lënduarve Ylli Salla./a.m.
