Kryeministri Edi Rama ka nisur që në orën 19:00 prezantimin e paketës së re të zgjeruar financiare për përballimin e situatës si pasojë e COVID-19.
Kjo paketë, siç ka bërë të ditur më herët vetë kreu i qeverisë në këtë paketë do të përfshihen edhe bizneset e vogla që nuk janë mbyllur, por kanë pasur dëme ekonomike si pasojë e kësaj situate (agjenci turistike, rrobaqepësi e mobileri të vogla, hidraulikë, elektriçistë, fizioterapi, kancelari, servise makinash e lavazhe të liçencuar), do të përfshihet gjithashtu biznesi i madh, sektori turistik dhe fasoneritë.
Edi Rama tha se masat shtrënguese duhet të vijojnë, dhe kjo është vetëm se në mbrojtje të jetës.
“E provuan disa të tjerë shumë më të mëdhenj më të fuqishëm se ne që ranë pre e sirenave dhe sot janë zhytur në vorbull infektimi dhe vdekje nga ku ende nuk po nxjerrin kokën në sipërfaqe. Ne e kemi kaluar fazën më të rëndësishme mbrojtjen e jetës, nuk numërojmë ë të vdekur përditë, por kurba mbahet nën kontroll më mirë se në shumicën e vendeve të Evropës, nuk shohim shtretër të mbushur, nuk kemi asnjë humbje jete në bluzat e bardha dhe nuk kemi as kufoma që s’kemi ku t’i varrosim. Detyra ime është të mos e ngatërroj dhimbjen aspak të vogël në jetën e përditshme në ekonominë vogël familjare me shkakun e vërtetë të këtij qëndrimi në mbrojtje që po mbajmë. Ky qëndrim i fortë në mbrojtje e cenon lirinë e qytetarëve, e cenon ndjeshëm ekonominë e familjeve shqiptare, edhe ekonominë tonë kombëtare. Ama mos e harroni, unë nuk e kam të drejtë ta harroj dot: Liritë edhe do të kthehen sapo ta fitojmë këtë luftë, ekonomia do ringrihet, por të vdekurit nuk i ringjallim dot nesër, nëse sot e tradhtojmë kauzën“, tha Rama.
Ai shtoi se cilido kryeministër në botë do të ishte i gatshëm të jepte gjithcka që ka në dorë. Por sipas Ramës, për aq kohë sa nuk dihet sesa do të zgjasë kjo luftë, municionet nuk duhet të shpenzohen të gjitha menjëhjerë.
