Nëse dikur qytetarët kërkonin të punonin në sektorin privat për një pagë më të lartë tashmë situata ka ndryshuar. Prej disa kohësh pagat kanë pësuar një rritje të konsiderueshme dhe në administartën publike. Në një analizë të Bankës së Shqipërisë rezulton se gjatë vitit të kaluar në Shqipëri rritja e pagave në sektorin publik rezultoi rreth 14%, ndërsa në atë privat vetëm 10%.
Të dhënat zyrtare konfirmojnë se shteti ka rezultuar me rritjen më të fortë të nivelit të pagave duke prekur nivelin e mbi 100 mijë lekëve në muaj. Edhe në privat ka pasur rritje të pagesave për punonjësit por përsëri mbetet në nivele më të ulëta krahasuar me administratën dhe rezulton vetëm 76 mijë lekë.
Në sektorin privat, rritja e pagave është shtrirë në të gjithë sektorët, por mbetet më e theksuar në sektorin e shërbimeve. Ky është një faktor i nxitur direkt nga zhvillimi i turizmit në vendin tonë kohët e fundit.
Rritja me bazë të gjerë e pagave përbën një premisë pozitive për përmirësimin e shëndetit ekonomik dhe financiar të familjeve shqiptare, me ndikim direkt në përmirësimin e aftësisë paguese të kredimarrësve dhe raporteve të disa treguesve të kredisë, si atij të “të ardhura ndaj borxhit” dhe të “shërbimit të borxhit ndaj të ardhurave”.
Edhe tregu i punës ka rezultuar pozitiv në vend. Niveli i papunësisë në vend ka pësuar ulje në fund të vitit të kaluar duke zbritur në nivele njëshifërore. Nga analizimi i të dhënave ka rezultuar se papunësia ka zbritur në nivelin 8.8% në fund të vitit 2024 duke pësuar një ulje vjetore me 0.8% kundrejt 9.5% një vit më parë.
Ky është një tregues shumë optimist i cili konfirmon ecurinë pozitive të ekonomisë në vend. Ndikim kryesor në rritjen e personave të punësuar në Shqipëri kanë dhënë sektori i shërbimeve që lidhet me turizmit por edhe industria.
