Sekretari i Përgjitshëm i Ministrisë së Arsimit Plarent Ndreca ka reaguar pas pretendimeve të shprehura nga ministrja teknike Mirela Karabina se “institucioni është i bllokuar si pasojë e vonesës së miratimit të kërkesës zyrtare për emërimin e Nëpunësit Autorizues”
Ndreca, të cilin karabina pretendon se e ka larguar nga detyra por që u rikthye nga DAP, sqaron se ka firmosur një ditë më parë, në cilësinë e Nëpunësit Autorizues të MAS, kalimin e pagave për punonjësit, ndërsa pretendimet e Karabinës i cilëson absurde dhe të pabaza.
“Është e paimagjinueshme që drejtuesja e institucionit godet në mënyrë absurde institucionin e saj, duke dalë në konkluzione krejtësisht të pabazuara dhe që i përkasin një realiteti që nuk ekziston në Ministrinë e Arsimit dhe të Sportit.
Pagat e të gjithë sistemit arsimor janë firmosur rregullisht nga drejtoritë arsimore rajonale dhe kaluar nga sistemi i thesarit të Ministrisë së Financave.
Njëkohësisht nga unë si nëpunës autorizues i Ministrisë së Arsimit dhe Sportit janë firmosur që dje urdhër pagesat për pagat e aparatit të MAS.
Pavarësisht pengesave, goditjeve të paligjshme dhe të padrejta që po i bëhen administratës publike në MAS, ajo është në detyrë dhe në mbrojtje të ligjit dhe interesave të qytetarëve shqiptarë”, ka thënë Ndreca.
/a.m.
