Ditën e sotme mediat publikuan rastin e një 36-vjeçareje nga Berati e cila shprehej se paraqitet prej muajsh në spitalin Onkologjik që të marrë ilaçin e nevojshëm për seancat e kimioterapisë për sëmundjen e saj, por sipas saj, nuk ka ilaç.
Por si është e vërteta e këtij rasti bazuar në kartelën e pacientes L.B
Pikërisht për këtë ka reaguar edhe QSUT. Drejtoria e Qendrës Spitalore Universitare “Nënë Tereza” ka sqaruar jo vetëm që zonja në fjalë e ka kryer ciklin e kimioterapisë dje në datën 29.01.2018, por ka bërë publike edhe kartelën e zonjës dhe të gjitha procedurat që janë ndjekur me këtë paciente.
Ja sqarimi i plotë i QSUT:
Drejtoria e Qendrës Spitalore Universitare “Nënë Tereza”, Tiranë sqaron në lidhje me rastin e pacientes L.B, banuese në Berat, e cila kurohet në shërbimin Onkologjik me nr. kartele 19276 me diagnozë “Sarkomë”, se mjekimi për këtë paciente dhe pacientë të tjerë të cilët kurohen me të njëjtën skemë mjekimi gjendet në spital dhe nuk ka patur mungesa.
Referuar kartelës së saj klinike, pacientja L.B kurohet me “vinkristinë, dakarbazinë dhe cisplatinë”, skemë mjekimi e vendosur prej disa muajsh bazuar në konsultën mjekësore të mjekëve onkologë dhe në datën 24.01.2010 është shtruar për të marrë mjekimin e rradhës në Shërbimin Onkologjik, pavioni i Kemioterapisë.
Pasi ka kryer analizat e gjakut dhe echo abdominale, të cilat bazuar në protokollet mjekësore të ndjekes së pacientëve që kryejnë kemioterapi bëhen pas tre seancave të para, mjekët kanë vendosur që të përdoret e njëjta skemë mjekimi edhe për seancat pasardhëse, pasi rezultatet e arritura ishin pozitive.
Aktualisht pacientja L.B ka kryer ciklin e rradhës së kemioterapisë datë 29.01.2018 me medikamente të cilat gjenden në spital.
