Analisti Baton Haxhiu, i ftuar në emisionin “Të Paekspozuarit” në MCN TV, ka folur për krizën e re në Kosovë, pas dështimit të zgjedhjes së Presidentit.
Haxhiu tha se Vjosa Osmani është e vetmja që ka fuqinë të marrë vota nga Vetëvendosja për t’i çuar te LDK.
“Tani jemi në një krizë, ajo zgjat deri në 21 Mars. Do të vendoset kur do të ketë zgjedhje. Gjykata Kushtetuese ka vendosur masë të përkohshme. Tani beteja është për fajësimin, kush është fajtor për këtë situatë. Sado Kurti përpiqet ta gjejë te Vjosa apo Rama apo Grenell, është për të ardhur keq që jetojmë ende në gjendje të jashtëzakonshme dhe kjo gjendje është me këtë qeveri”, deklaroi Haxhiu.
Lidhur me idenë që ka hedhur Vjosa Osmani, që Presidenti të zgjidhet nga populli, Haxhiu tha se kjo është e pamundur pasi për ndryshimet Kushtetuese duhen 2/3 e minoriteteve dhe kjo nuk mund të arrihet.
“Ideja që të zgjidhet President nga populli, kjo nuk bëhet, është vendosur kriteri nga Kushtetuta, që për çështje që kanë të bëjnë me këto gjëra, të vendoset 2/3 e minoriteteve. Duhet gjashtë serbë të dalin që të fitojmë të drejtën për ndryshimin e Kushtetutës. Ti kesh brenda 80 deputetëve 2/3 e minoriteteve, nuk arrihet. Absolutisht dyshoj se do të ndodhin këto ndryshime të mëdha.
Arsyeja që e sulmojnë Vjosën, kjo pas datës 4 ka të drejtë të bëjë listën e vet dhe nëse një personalitet, e ka aftësinë dhe fuqinë për ti marrë vota Vetëvendosjes dhe për ti dërguar në shtratin e LDK është kjo grua. Është luftëtare, ka retorikë politike, ka lidhjet e veta në bashkësinë ndërkombëtare”, tha ndër të tjera Haxhiu.
