Niveli i humbjeve të energjisë në rrjet për muajin shtator, ku përfshihen humbjet teknike dhe joteknike, ka zbritur në nivelin e 25.3% të energjisë së transmetuar. Ky është niveli më i ulët i humbjeve në rrjet, të paktën në 5 vitet e fundit. Zonat më problematike për humbjen e energjisë për periudhën janar-gusht janë; Kukësi me 56.1% dhe Shkodra me 46.1%.
Humbjet në rrjetin e energjisë në Kukës janë rritur me 7.1% gjashtë muajt e parë të vitit krahasuar me të njëjtën periudhë të një viti më parë, ndërsa në të gjitha zonat e tjera humbja e energjisë në rrjet është ulur me mesatarisht 8%. Në Shkodër humbjet janë ulur me 8.4%; nga 54.5% që ishin në gjashtë muajt e parë të 2014-ës, në 46.1% në pjesën e parë të 2015-ës.
Zona me humbjet më të pakta të energjisë në rrjetin e shpërndarjes është Gjirokastra, me 23.4% të energjisë së transmetuar. Në gjashtë muajt e parë të vitit të shkuar humbja në rrjet në zonën e Gjirokastrës ishte 27.4%. Zona që ka shënuar uljen më të madhe të humbjeve në janar-gusht është Fieri, me 9.8%. Të dhënat zyrtare të OSHEE-së tregojnë se totali i humbjeve në të 10 zonat në janar-gusht për vitin 2015 ishte 31.7%, ndërsa në të njëjtën periudhë të një viti më parë ishte 39.9%. Ulja e humbjeve në përqindje është 8.2%. Ndërsa humbjet në total si 8-mujor, tekniket dhe jotekniket, arritën në 31.72%, nga 39.4% që ishin në të njëjtën pjesë të vitit 2014, dhe 44.3% të regjistruara në 8-mujorin e parë 2013.
Arkëtimet
Operatori i Shpërndarjes së Energjisë Elektrike ka publikuar të dhënat e treguesve të muajit shtator dhe rezultatet progresive të 9-mujorit të këtij viti. Niveli i arkëtimeve në total, si 9-mujor ka arritur në rreth 500 milionë USD, ndërsa vetëm në muajin shtator rezulton të jenë arkëtuar 52 milionë USD. Krahasuar me të njëjtën periudhë 9-mujore të vitit 2014 janë arkëtuar 150 milionë USD më shumë, ndërsa krahasuar me vitin 2013 kjo diferencë shkon në 200 milionë USD më shumë.
Rritja e pagesave
Të ardhurat e realizuara nga arkëtimet në total për periudhën janar-gusht të vitit 2015 ishin 44.5 milionë dollarë, ndërsa për të njëjtën periudhë të një viti më parë ishin 29.8 milionë dollarë. Të krahasuara sipas zonave del se niveli i arkëtimeve është rritur më shumë në zonën e Kukësit, me 218%. Në këtë zonë, në gjashtë muajt e parë të vitit janë arkëtuar nga faturat e energjisë 715.8 milionë, ndërsa një vit më parë, në të njëjtën periudhë janë arkëtuar 225 mijë dollarë. Më pas vjen Shkodra, me rritjen e arkëtimeve me 101%. Burreli është një zonë ku arkëtimet kanë shënuar rritje me 79%; në gjatë muajt e parë të 2015-ës janë arkëtuar 1.9 milionë dollarë, ndërsa në të njëjtën periudhë të një viti më parë janë arkëtuar 1.1 milionë dollarë. Arkëtimet janë rritur me 39% në Tiranë./ Gazeta Shqiptare
