Shtohen kategoritë përfituese të kompensimit të energjisë prej 648 lekësh në muaj. Përfituesit janë kryefamiljarët që përfitojnë pension pleqërie shtetëror, pension pleqërie fshati ose pension social, por që janë me banim në qytet dhe nuk kanë anëtarë të familjes të punësuar ose të vetëpunësuar.
Kategoria e dytë janë kryefamiljarët që përfitojnë pension pleqërie ose pension social që janë me banim në fshat, kur familja përbëhet vetëm nga pensionistët. Në kategorinë e tretë të pensionistëve që do të përfitojnë kompensimin janë rastet kur në të njëjtën familje ka dy pensionistë të vetëm dhe kontrata është në emër të pensionistit jokryefamiljar, ku kompensimin e përfiton pensionisti në emër të të cilit është kontrata e energjisë elektrike. Në rastet kur, si e ardhur e vetme e familjes është pensioni familjar dhe kontrata është në emër të kryefamiljarit pasjetues, të fëmijëve ose në emër të kryefamiljarit të vdekur, kompensimi u akordohet personave përfitues të pensionit familjar. Vendimi është marrë nga Këshilli i Ministrave dhe hyn në fuqi sot, pasi është botuar në Fletoren Zyrtare.
Vendimi
Qeveria ka miratuar ndryshimet në vendimin nr.8, datë 14.1.2015, të Këshillit të Ministrave, “Për mbrojtjen e shtresave në nevojë, për efekt të heqjes së fashës së konsumit të energjisë elektrike deri në 300 kwh në muaj. Përveç shtesës së kategorisë, janë parashikuar edhe efektet financiare nga zbatimi i këtij vendimi, të cilat përllogariten në shumën 30 000 000 lekë dhe përballohen brenda fondeve të buxhetit të sigurimeve shoqërore të vitit 2016.
Dokumentet
Dokumentacioni bazë që ne kemi kërkuar është plotësimi i një deklarate, që gjendet në agjencitë lokale të sigurimeve shoqërore, një certifikatë familjare që provon përbërjen familjare, dhe për secilin prej tyre duhet të jetë i saktë nëse janë të pension, nëse janë të punësuar ose të vetëpunësuar. Po ashtu, duhet edhe një dokument që provon pagesën e energjisë elektrike: libreza e fotokopjuar ose një vërtetim që lëshon OSHEE-në, për faktin që personi nuk është debitor.
Pagesa
Udhëzimi i Ministrisë së Mirëqenies Sociale dhe i Ministrisë së Financave përcakton edhe mënyrën se si do të merret kompensimi i energjisë elektrike për pensionistët dhe invalidët. ISSH-ja bazuar në listat e përfituesve harton pasqyrat përmbledhëse të kompensimeve, të detajuar sipas muajve për çdo drejtori rajonale në bazë qarqesh dhe paraqet kërkesën për fonde për financimin e pagesave pranë MMSR-së.
Bazuar në kërkesën e drejtuar nga ISSH-ja, MMSR-ja bën çeljen e fondeve për llogari të ISSH-së, pranë degës së Thesarit Tiranë dhe e autorizon atë për tërheqje. Shpërndarja e fondeve sipas Drejtorive Rajonale dhe zyrave të pagesës në qarqe, bëhet nga Instituti i Sigurimeve Shoqërore.
ISHTE
“Kryefamiljarët, që përfitojnë pension pleqërie shtetëror ose pension pleqërie fshati, por që janë me banim në qytet dhe nuk kanë anëtarë të familjes të punësuar ose të vetëpunësuar.”
BËHET
“Kryefamiljarët që përfitojnë pension pleqërie shtetëror, pension pleqërie fshati ose pension social, por që janë me banim në qytet dhe nuk kanë anëtarë të familjes të punësuar ose të vetëpunësuar.”
ISHTE
Personat paraplegjikë e tetraplegjikë
SHTOHET
“Kryefamiljarët që përfitojnë pension pleqërie ose pension social që janë me banim në fshat, kur familja përbëhet vetëm nga pensionistët.”
ISHTE
Kompensimi, për familjet që do të kompensohen, sipas pikës 1, të këtij vendimi, bëhet vetëm për 1 kontratë të energjisë elektrike dhe jepet vetëm një herë për një familje, pavarësisht se ato mund të kenë në përbërje edhe të punësuar të tjerë në sektorin buxhetor, të cilët kanë pagë nën 35 000 lekë, apo persona të paaftë a invalidë, persona që
NDRYSHIMET NË LIGJ
përfitojnë pension pleqërie, invaliditeti apo ndihmë ekonomike.
BËHET
“Në rastet kur në të njëjtën familje ka dy pensionistë të vetëm dhe kontrata është në emër të pensionistit jokryefamiljar, kompensimin e përfiton pensionisti në emër të të cilit është kontrata e energjisë elektrike. Në rastet kur, si e ardhur e vetme e familjes është pensioni familjar dhe kontrata është në emër të kryefamiljarit pasjetues, të fëmijëve ose në emër të kryefamiljarit të vdekur, kompensimi u akordohet personave përfitues të pensionit familjar.”
ISHTE
Përfituesit, që kompensohen për të përballuar rritjen e çmimit të energjisë elektrike, si rezultat i heqjes së fashës deri në 300 kwh, sipas pikës 1, të këtij vendimi, do të përcaktohen nga institucionet përkatëse në të cilat ata marrin pagën, pensionin dhe përfitimet e tjera, kundrejt deklarimit të tyre personal.
BËHET
Edhe nëse përfituesi plotëson kriteret e përfitimit, kompensimi nuk përfitohet nëse nuk ka konsum të energjisë elektrike dhe paguhet vetëm tarifa fikse e shërbimit./GSH/a.r.
