Pasi ra pre e mashtrimit, 30-vjeçari Barush Ahmeti, i cili është drejtori i postës në Manzë, iu drejtua Policisë për të kryer denoncimin. Ai ka pohuar se kishte qëllime serioze me vajzën, por është mashtruar nga ajo.
“U njohëm dy vite më parë nëpërmjet rrjeteve sociale. Pas komunikimit intensiv, mendova pse jo të mos vazhdoj më tutje. Ndërkohë që unë isha i sinqertë, ajo më mashtronte. Nga viti 2015 u njohëm, e më thoshte që ishte në gjendje të keqe ekonomike.
Më shkruante në “FB” dhe unë i dërgoja dhurata dhe i paguaja detyrimet që ajo kishte. Më pas më thoshte se donte gjëra dhe unë ia kam blerë. Pra më thoshte se kemi borxhe këtu, kemi borxhe atje. Unë përpiqesha ta ndihmoja, pa ditur se ajo më mashtronte dhe kërkonte të përfitonte nga unë. Unë punojë në administratë shtetërore dhe kam vëllezërit në emigrim. Ata më sillnin lekë për familjen, ndërsa unë mbaja edhe këtë. Pastaj kuptova se diçka nuk po shkonte dhe i thashë ose takohemi, ose t’i japim fund këtu kësaj lidhjeje virtuale, pasi nuk kam interes. Mirë më tha, po do të takohemi në Itali se do të shkoj te të afërmit e mi dhe takohemi atje. Shkova në Itali, në Milano, kërko për këtë hiç. U përpoqa të lidhesha në FB, por më bëri ‘block’”, tha ai, raporton “Panorama”.
Dëshmia e plotë:
Ne u njohëm në vitin 2015 në “Facebook” dhe ajo më thoshte që ishte bionde e bukur. Atë fotografi kishte vendosur edhe në foton e profilit dhe pasi folëm disa herë unë u dashurova pas saj. E kisha seriozisht ishte vajza me të cilën do martohesha.
Më tha që jetonte dhe ishte emigrante në Itali. Më tha që familja e saj kishte disa vështirësi ekonomike dhe fillimisht më kërkoi lekë. Ja kam nisur me Western Union. Nisa 1 mijë euro në emrin e saj. Më pas më kërkonte lekë vazhdimisht sepse më thoshte që donte të krijonte besim tek unë. Më thoshte se do të m’i kthente. I kam dërguar 10 mijë euro me Western Union, prej vitit 2015. Më tha njëherë se ishte sëmurë dhe unë u nisa për në Itali. Kur shkova në Itali, më tha që të kthehesha se kishte ardhur në Shqipëri. Shkova në Itali e nuk e gjeta. Më thoshte që jetonte në qytet në Durrës, dhe nuk e linin prindërit të dilte jashtë të takonte asnjë njeri. Më thoshte që e mbanin të mbyllur brenda katër mureve.
Për të vërtetuar dashurinë time karshi saj më tha se në Manëz kishte një teze, që ishte në gjendje të keqe shëndetësore dhe ekonomike. Në fillim iu kam blerë kolltuqe dhe divane. Iu kam dërguar çdo orendi shtëpiake herë pas here. Më thoshte se më donte dhe tezen e saj duhet ta ndihmoja njësoj sikur ishte shtëpia ime.
Unë e mendoja se do të martohesha me të. Edhe drutë për t’u ngrohur në dimër, televizor, frigorifer, lavatriçe dhe çdo orendi shtëpiake iu kam blerë e ia kam çuar me paratë që më dërgonin vëllezërit nga emigracioni. Flisnim në telefon dhe më thosjte se do të mi shlyente të gjitha gjërat që bëja për të të. Më thoshte se do të m’i kthente lekët dhe do të martohej me mua. Punoja në fshat në punë shteti, dhe njëkohësisht më dërgonin para vëllezërit që kam jashtë shtetit. Të gjitha paratë ia kam dhënë të dashurës time që nga viti 2015 kur u njohëm.
Ajo më thoshte jemi keq, dua të më ndihmosh me para. Donte dhurata të shtrenjta. Ia dërgoja lekët me Western Union dhe i blente. E doja për nuse në shtëpi, por ajo më ka mashtruar. E mendoja se ishte nga qyteti i Durrësit, më tegoi të gjithë historinë e jetës së saj. Kemi folur në “Facebook” me mesazhe edhe në gjumë me njëri- tjetrin. Nga fotoja që shihja në FB ishte shumë e bukur, bionde dhe shumë joshëse. Nuk e kisha pandehur se do më bënte këtë gjë. Nuk e kam takuar asnjë herë, sepse më thoshte që nuk e lejonte familja që të dilte jashtë shtëpisë.
Kur vëllezërit më kërkuan lekët, i thashë se më duhen lekët që më kish marrë borxh, por pas kësaj kërkese më la, ma mbylli adresën, më bëri blok në FB, dhe nuk më përgjigjej më. Unë kisha menduar se ajo do të ishte nusja ime, por ajo më la pasi mu mbaruan lekët”.
