Partia kryesore opozitare turke kërkoi sot anulimin e referendumit që miratoi një ditë më parë një rishikim kushtetues për forcimin e kompetencave të presidentit Recep Tayyip Erdogan, duke denoncuar parregullsi.
“Ka vetëm një vendim për të marrë. Ky është anulimi i zgjedhjeve nga Këshilli i Lartë Zgjedhor (YSK)”, deklaroi Bülent Tezcan, nënkryetar i CHP (social-demokrate), cituar nga agjencia e lajmeve “Dogan”.
CHP-ja, si dhe partia prokurde HDP kritikuan hapur një vendim të marrë nga YSK për të pranuar si të vlefshme fletët e votimit pa vulën zyrtare të autoriteteve zgjedhore. Opozita e konsideron këtë veprim si një manovër e spekulimeve të mundshme.
Tezcan konfirmoi sot se një numër i konsiderueshëm zgjedhësish nuk kanë votuar në privaci, dhe se procesi i numërimit është kryer në mënyrë të fshehtë./b.d
