Militantët e Partisë Demokratike kanë kaluar natën e parë të protestës para Kryeministrisë ndërsa mëngjesin e sotëm ata janë vizituar nga deputetë të opozitës dhe kryedemokrati Lulzim Basha.
Gjatë takimit mëngjesin e së dielës, Lulzim Basha është parë t’i afrohet çadrës në bulevard i shoqëruar edhe nga bashkëshortja e tij.
Kanë qenë Enno Bozdo dhe Tritan Shehu ata që kanë mbërritur më herët pranë militantëve të PD, ndërsa kanë bërë thirrje për largimin e Ramës dhe garantimin e zgjedhjeve përmes qeverisë teknike.
PD shënon sot ditën e dytë të protestës ndërsa nuk ka dhënë një përgjigje se cili është plani në rast se qeveria nuk largohet. Mëngjesin e sotëm në media është aluduar për një vendim tjetër që PD pritet të marrë dhe që lidhet me bojkotimin e Kuvendit.
Kjo, pasi do të ishte e pakuptimtë vijimi i betejës në Parlament për aq kohë sa arena politike e opozitës është zhvendosur në shesh. Për të diskutuar vijimësinë në Kuvend dhe atë të protestës, PD ka lajmëruar se sot në 14:00 do të mbledhë kryesinë. /javanews
