Janë zbardhur emrat e personave të arrestuar pas zbulimit të një skeme mashtrimi, që i shkaktoi shtetit një dëm financiar prej 20 milionë lekësh.
Bëhet fjalë për shtetasit: Shpati Agolli, administrator i shoqërisë “S.Agolli Group”;
Samuel Hajdini, me detyrë specialist në Drejtorinë e Përgjithshme të Tatimeve;
Elsion Allushi, me detyrë administrator i Zyrës së kontabilitetit “Smartfin”;
Leonard Runa, ekonomist tek zyra e kontabilitetit “Smartfin”; si dhe Adrian Keke.
Këta persona akuzohen për krimin e skemave mashtruese.
Hetimet kanë zbuluar se këta persona përmes subjekteve fiktive si “Liana Solution”, “SD.Agolli Group”, “Solution &Construction 2000” dhe Studioja e kontabilitetit “Smartfin”, gjatë viteve 2018-2019 kanë bërë ndërmjet tyre shitje fiktive në vlera të konsiderueshme monetare që arrijnë vlerën 130.052.820 lekë, duke i shkaktuar shtetit një dëm me “tvsh” në vlerën 20.568.304 lekë.
Për të gjithë këta shtetas, Gjykata e Rrethit Gjyqësor Tiranë ka caktuar masën e sigurimit “Arrest në burg“.
Pesë personat akuzohen për këto vepra penale: “Krijimi i skemave mashtruese lidhur me tatimin mbi vlerën e shtuar”, “Falsifikimi i vulave, stampave ose formularëve”, “Fshehja e të ardhurave”, “Mospagim i taksave dhe tatimeve” dhe “Shpërdorimi i detyrës”.
Ndërkaq, dy të tjerë janë në kërkim. /e.s/
