Ministrja e Drejtësisë, Etilda Gjonaj përmes një deklarate për mediat, ka njoftuar 6 shkarkime të tjera nga puna të zyrtarëve në Hipotekën e Durrësit.
Këto masa, vijnë menjëherë pas shkarkimit nga puna të kreut të kësaj drejtorie pak ditë më parë.
Ish-kreu i Hipotekës së Durrësit u filmua duke iu drejtuar me arrogancë qytetarit, duke i thënë; “shko të ta zgjidhë problemin Rama”.
Në një deklaratë për mediat, ministrja njoftoi se pas 15 masave disiplinore të marra më herët, kontrolli i bërë së fundi ka nxjerrë në pah një sërë problemesh.
“Bazuar në informacionet e marra mbi praktika abuzive, Task Force ka ushtruar kontroll tjetër në këtë zyrë dhe nga praktikat e monitoruara rezultojnë aplikime të trajtuara jashtë afateve, sistemi online nuk pasqyron situatën aktuale, është gjendur se ai nuk është administruar dhe përdorur në të gjitha fazat e tij, nuk është vepruar në përputhje me kërkesat për arkivimin e teknikave në zyrat e Hipotekës duke bërë referenca të shërbimeve të paarkivuara e duke sjellë pasoja në origjinën e pasurisë.
Pas kësaj u vendos largimi për 6 specialistë të zyrës dhe vërejtje më shkrim për 10 të tjerë jurisë dhe hartografë, duke e cuar në total numrin e masave në 31 masa”- tha ajo.
