Emisioni investigativ “Stop” denoncoi mbrëmjen e djeshme një tjetër rast korrupsioni. Bledar Pullazi, inspektori i IKMT-së u kap përmes kameras së fshehtë duke marrë para për një leje legalizimi.
Pas publikimit të videos, ka reaguar kreu i këshilltarëve të djathtë në Bashkinë e Tiranës, Leonard Olli, i cili deklaroi se inspektori i IKMT-së është vëllai i Florian Pullazit, këshilltar i majtë në Këshillin Bashkiak të Tiranës.
“Skandali i zbuluar nga emisioni investigativ Stop, nuk është një rast i izoluar i një inspektori të ndërtimit që kërkon para në këmbim të favorit. Ky rast korruptiv, është e vërteta e rilindjes, është shëmbëlltyra e saj. E para tregon mënyrën se si është bërë inspektor personi në fjalë. Një militant që vjen e ushtron me arrogancë e me dhunë, pushtetin, përmes njohjeve që ka me Saimir Tahirin e Erion Veliajn. Përmes lidhjeve nepotike po ashtu, duke qenë vëllai i këshilltarit të majtë në Bashkinë e Tiranës, Florian Pullazi. E dyta, ky rast tregon se Pullazi dhe shefat e tij, rrjeti i tij, e gjithë ngrehina të cilës ai i përket, ka ardhur në pushtet për të bërë para. Me babëzi, duke shkelur ligjin, duke dhunuar qytetarët e pamundur, e duke i rrjepur ata, kështu funksionin banda e INUK dhe bandat e tjera të Edi Ramës që i janë vërsulur popullit që ditën e parë që erdhën në pushtet.”- deklaroi Olli.
“Koha e këtij shteti të korruptuar e kriminal; Koha e këtyre maskarenjeve ka mbaruar. Populli është në këmbë dhe shumë shpejt ka tu treguar vendin”, përfundoi Olli.
BW
